Nakabulig ang amat-amat nga pagtinlo sang mga creek sa Bacolod City sa indi pagbaha sa pihak sang pag-ulan kahapon.
Sa interview sang Bombo Radyo Bacolod kay Bacolod City Mayor Greg Gasataya, isa man sa factor nga wala nagbaha ang ciudad ang bangod sa tubig nga ginabubo sang ulan bangud mas dako ang tubig-ulan sang tinalikdan kun ipanggid kahapon.
Suno kay Gasataya, bisan ano pa kanami ang drainage system kun tuman kadamo ang volume sang tubig nga ginabubo sang ulan maawas gid ini kag mahimo nga magtuga sang pagbaha.
Samtang, ginpahayag sang alkalde nga tuman pa kadamo sang mga creeks sa ciudad sang Bacolod ang dapat nga tinluan kag wala pa sila nakasulod sa mga interior nga mga sapa.
Samtang kahapon, ginpakakas man sini ang isa ka structure nga wala naman sang naga-istar sa bahin sang Banago river.
Aminado ini nga tuman pa kadamo sang mga sapa nga dapat nga matinluan sa ciudad.
Samtang liwat man sini nga gin-athag nga indi pa operational ang ginpahimo nga diversion channel sa reclaimation area bangud kinahanglan pa ini nga matakdan sang flood gates.
Ang floodgates ang magapugong sang tubig nagikan sa dagat sa pagsulod sa ciudad sa tion nga maghigh tide nga isa man sa magatuga sang pagbaha sa ciudad sang Bacolod.
