Nagpatigayon sang clearing operation sa mga ambulant vendors kag iban pa nga mga indi nagakaangay sa Bacolod Public Plaza kaina sang aga.
Ang operasyon ang ginpatigayon sang Public Order and Safety Office (POSO) kaupod ang Bacolod City Legal Office (CLO) kag Department of Social Services and Development (DSSD) sumugod alas-8:00 kaina sang aga.
Sa interview sang Bombo Radyo Bacolod kay POSO head retired General Primitivo Tabujara, ang una nila nga gintarget amo ang mga nagatulog sa mga benches sa public plaza kun sa diin sila ang nakatipon sang inisyal nga 16 ka mga homeless.
Ang mga ini ang gintipon kag gin-orient sang social worker sa mga ginadumilian sa public plaza.
Suno kay Tabujara, ang mga matumod nga residente sang Bacolod City ang idul-ong sa ila nga mga pamilya, samtang may-ara man sang homeless nga tumandok pa sang Samar.
Ginclearing man nila ang mga ambulant vendors, kalakip na ang mga manikurista, nagapaninlo sapatos kag iban pa nga nagabilin sang ila mga kagamitan sa area.
Kalakip man sa ginpahalin ang mga nagachess nga nagapatigayon sang illegal nga panahor kag ang mga nagabaligya sa footwalk kaangay sang ice cream vendor.
Paathag ni Tabujara nga ang mga vendors nga nahatagan sang permit ang may instruction nga indi mahimo maglapaw ang ila baligyaan sa footwalk.
Kalakip man sa ila ginasaway ang mga commercial sex workers kag bugaw nga yara sa public plaza, mga rugby boys kag bisan ang mga barker nga masabad kag nagapang-away sang mga nagapark kun sila ang indi kompormi sa ginahatag sang motorista.
Sumugod bwas, dumilian na sa public plaza ang mga barkers.
Sila ang magatukod man sang task force kag padayun nga maga-implementar sang unannounced inspections.
