Ginsuguran na subong nga adlaw ang clearing operation sa Barangay 27, Bacolod City.
Madumduman nga tatlo ka Purok sang Barangay ang ginlamon sang kalayo sang tinalikdan kun sa diin masobra 200 ka balay ang nangin abo.
Nakaangkon naman sang kabudlayan sa pagsulod sang mga bombero bangod kitid ang dalan.
Sa interview sang Bombo Radyo Bacolod kay City Administrator Atty. Mark Steven Mayo, nakasugtan na sang mga pumuluyo ang pagclear sang pila ka mga propedad agud mahimuan sang kapin tatlo ka metro ukon mas malapad pa nga dalan ang Barangay.
May initial plan naman si Punong Barangay Freeman Madalag kun sa diin ipahamtang ang dalan kag kun sin-o ang mga magasakripisyo sang bahin sang ila balay.
Ini bangod sa pagpalapad sang dalan sa tatlo ka metros, may mga bahin sang balay nga kinahanglan bakbakon, apang ini ang ginsugtan man sang mga pumuluyo.
Kabahin sa bulig nga promisa ni Bacolod City Mayor Greg Gasataya, nagpadala sang manpower kag mechanical equipment ang city government.
Yara sa aktibidad ang mga katapo sang City Legal Office, City Engineers Office, Bacolod Environment and Natural Resources Office kag Disaster Risk Reduction and Management Office.
Suno diri, sila ang nakaschedule sa clearing operations tubtob bwas, magapahuway sa Domingo, kag magaresume sa Lunes kun kinahanglan.
Ini ang temporaryo nga tikang antes liwat nga mapabalik ang mga pumuluyo.
Para sa long term plan, bangod natumod na nga national property ang duta, ginalantaw nga makapatigayon sa lugar sang long-term housing program.
