Nagpagwa sang pahayag ang medical center chief sang Corazon Locsin Montelibano Memorial Regional Hospital nahanungod sa nurse nga nagpositibo sa rapid test.
Suno sa interview sang Bombo Radyo Bacolod kay Dr. Julius Drilon, yara sa 12 ka mga hospital personnel ang ginatan-aw nga may positibo nga contact sa patient #8 sang Bacolod nga nagtaliwan na, apang 21 ang tanan nga ginpaidalom sa test bangod gindala na pati ang mga secondary contact.
Isa sa mga gintest ang nagabusong nga nurse kag nagpositibo ini sa rapid test kag yara na ini naka-isolate sa emerging infectious disease facility.
Ginklaro ni Drilon nga ang nagpositibo sa rapid test ang wala nagakahulugan nga positibo naman sa COVID-19 bangud lain ang rapid test sa PCR test.
Suno sa doktor, pinaagi sa rapid test mahibaluan kun positibo sa antibody batok sa SARS-CoV-2 nga ginatunaan sang balatian nga COVID-19.
Ginatest ang antibody kun may impeksyon para mahibaluan kun positibo ini sa virus, apang indi buot silingon nga may SARS-CoV-2, positibo na sa COVID-19.
Suno pa diri, ang physiological changes sa lawas ang sarang makapataas sang antibody kag kaupod na diri ang pagbusong, rason kun ngaa nagpositibo ang nurse.
Pagatawagan naman ni Drilon ang counterpart sini sa Western Visayas Medical Center sa Iloilo agud nga mapadasig ang pagproseso sang test result sang nasambit nga nurse.
