Wala sang nakita nga problema ang convenor sa kontra daya sa ginpatigayon nga senate close door meeting kaupod ang Commission on Elections (COMELEC) angot sa Smartmatic Security Breach.
Suno kay Professor Danilo Arao, wala sang problema ang ginpatigayon nga close door meeting apang dapat nga ang mga nangin highlights sa meeting ang ginapalayag sa publiko.
Ginpahayag ni Arao, nga dapat indi mangin kabahin sa bisan ano nga election related legislative inquiry sanday Senator Imee Marcos nga amo ang chairman sang committee on electoral reforms kun sa diin ang utod sini ang nagapadalagan bilang presidente kasubong man si Senator Vicente “Tito” Sotto III nga amo ang Senate President kasunod sang pagpapili sini bilang bise presidente sa May 9, 2022 elections.
Ini bangud sila ang makabig persons in interest kag indi madula ang collective suspision sang mga tawo nga may yara sang mga biases nga matabo.
Indi naman bag-o ang pangduha-duha sang mga pumuluyo nga ginamind conditioning, nga mahimo manipulahon ang resulta sang palaabuton nga piniliay.
Suno kay Arao, sang tinalikdan pa lang nga tuig naghatag na sang paandam ang Kontra Daya angot sa pagka-imbulbar sang smartmatic sa piniliay sa maabot nga May 9.
Suno pa diri 2010 pa lang may ginapagwa na sila nga punto batok sa smartmatic bangud ini mismo ang indi luyag nga mangin fully transparent.
Bisan ang source code ang indi sang mga ini luyag nga himuon nga open source kag mas luyag sang mga ini ang propriety software.
Suno diri importante ang mga imbestigasyon nga ginapatigayon sang senado ukon kongreso apang dapat siguruhon nga ini ang independent.
Dako naman nga palamangkutanon sa karun kun paano napagwa ang laptop kag nakawat ang datos sang smartmatic bangud sa pagsulundan sa IT professionals, dapat may yara sang non disclosure aggreement antes pa man mag-operate sang mga machines.
