Nagsugod na subong nga hapon ang rerouting sang mga salakyan nga nagalabay sa Dalan San Juan sa tupad sang Bacolod City Public Plaza kadungan sang MassKara Festival.
Santo sa traffic rerouting plan nga ginpreparar sang Bacolod Traffic Authority Office, may pagbag-o sa ruta nga labayan sang mga salakyan sa Dalan Lacson, Bacolod Public Plaza kag Bacolod City Government Center nga napilian bilang festival sites.
Suno kay BTAO head Police Major Junji Liba, sugod subong nga hapon, sirado ang Dalan San Juan halin alas-4:00 sa hapon tubtub alas-3:00 sa kaagahon gani ang mga salakyan ang magadulhog sa SM City.
Buksan naman ang Dalan San Juan sugod alas-3:00 sa kaagahon tubtub alas-4:00 sa hapon.
Ang road closure ang nagsugod subong nga Oktubre 1 tubtub Oktubre 23 bangud sa food festival kun hapon tubtub gab-i.
Makambyo naman ang rerouting scheme sa Street Dance and Arena Competition sa Oktubre 23.
Ang mga salakyan naman nagikan sa east ang tubtub lamang sa Dalan Locsin kag balik naman sa ila nga point of origin.
Samtang sirado naman ang Dalan Lacson halin sa intersection sang BS Aquino Avenue padulong sa Cottage Road halin sa Oktubre 19 tubtub Oktubre 20 sang gab-i bangud butangan ini sang stage gani igareroute ang mga salakyan sa Dalan Aguinaldo nga himuon nga one way.
Sirado man ang dalan sa palibot sang Bacolod City Government Center sa Oktubre 22, halin sa Dalan Burgos padulong sa Doña Juliana.
Ang halin naman sa north ang tubtub lamang sa Dalan Burgos kag mangita ini sang lusutan agud nga makapadulong sa sur.
Ang Electric MassKara sa Oktubre 22 sang gab-i halin alas-6:00 sang gab-i tubtub alas-9:00 sang gab-i ang magasugod sa Upper East kag magalibot sa BCGC pabalik sa Upper East.
