Ginalantaw nga mabudlay nga mapatigayon ang cloud seeding nga ginrequest sang Negros Occidental Provincial Government.
Sa pahayag ni Negros Occidental Governor Eugenio Jose “Bong” Lacson, nagdangat na sa P77,702,833.81 ang balor sang kahalitan sa sektor sang agrikultura bangod sa El Niño Phenomenon.
Sa report sang Office of the Provincial Agriculturist, Ang pinakamalala nga nahalitan amo ang ciudad sang Kabankalan, kun sa diin 13 ka Barangay ang apektado nga ginabug-usan sang 1,214 nga mga mangunguma kag 978.94 hectares sang humayan sa balor nga P41,726,761.20.
Ginalantaw naman sang Kabankalan City Government ang pagdeklarar sang State of Calamity bangod sa kahalitan sang El Niño.
Kasunod diri amo ang banwa sang Cauayan nga may 17 ka Barangay nga apektado nga ginabug-usan sang 187 ka apektado nga mangunguma nga nagapanag-iya sang 176.66 hectares sang humayan sa balor nga P14,001,540.
Ang Cauayan Municipal Government ang una naman nga nagpahayag nga magadeklarar sang state of calamity.
Suno kay Lacson, positibo ini nga makasurvive ang irrigated farm lands samtang una naman sila nga nagpaandam sa mga indi malab-utan sang tubig sa risgo nga mamiyerdihan, apang madamo gihapon sang nagrisgo sa pagtanom.
Nagrequest na ang gobernador sa Department of Agriculture Regional Office 6 nga mapadulongan ang probinsya agud mascan ang area sa posibilidad sang cloud seeding.
Apang sa inisyal nga assessment sang staff gikan sa Bureau of Soil and Water Management, nakita nga kalabanan sa mga potential clouds para sa seeding ang makita lamang sa Northern Negros Occidental apang yara sa Southern Negros Occidental ang may mga kahalitan tuga sang El Niño.
Ginalauman ni Lacson nga makahatag na sang rekomendasyon ang Department of Agriculture sa masunod nga semana.
