Ginpatigayon subong nga semana ang Cluster meet sang mga buluthuan sa Department of Education (DepEd)- Division of Negros Occidental bilang preparasyon para sa Provincial meet kag Regional meet
Sa interview sang Bombo Radyo Bacolod kay Romeo Sison, Negros Occidental Sports Coordinator, tatlo ka cluster ang nagpatigayon sang hinampang, ini ang ginalakipan sang Cluster 1 sang banwa sang Calatrava, Toboso, kag Salvador Benedicto; Cluster 3 sang banwa sang EB Magalona, Murcia kag ciudad sang Talisay; kag Cluster 5 sang banwa sang Hinigaran, Binalbagan, La Castellana, kag Moises Padilla.
Ang nagdaog ang magarepresenta sang ila mga area para sa provincial meet nga ginalauman patigayunon sa Pebrero sa masunod nga tuig samtang ang regional meet naman ang posible patigayunon sa Marso, 2025.
Apang, sa karun suno kay Sison, wala pa nakahatag sang derektiba ang DepEd kun bala may yara na sang Negros Island Region Athletic Association (NIRAA) Meet ukon padayon nga maga-upod ang probinsya sa Western Visayas Regional Athletic Association (WVRAA) Meet.
