Ginahulat pa sang Coast Guard Station Negros Occidental nga magpagwa sang executive order si Mayor Evelio “Bing” Leonardia bilang pagrespondi sa EO 167 ni Iloilo City Mayor Jerry Treñas nga nagapahanugot sang resumption of travel halin sa Bacolod to Iloilo City vice versa epektibo subong nga adlaw, Oktubre 14, 2020 antes magbaton sang mga fast craft nagikan sa Iloilo.
Sa interview sang Bombo Radyo kay Commander Jansen Benjamin, ginpahayag sini nga ila pa ginahulat ang direktiba sang alkalde bangud tubtob wala sila sang may nakaptan nga dokumento nga magabaton na sang mga fast craft companies ang ciudad, wala sang pagahimuon nga pagbag-o sang protocol.
Suno kay Benjamin, kun wala pa nakapagwa sang EO si Mayor Bing, sarang man nga makasakay sa mga RORO vessels ang mga luyag magpadulong sa Iloilo City apang kinahanglan nga magcomply man sa guidelines sang nasambit nga ciudad.
Kun makapagwa na sang EO ang alkalde, suno sa commander, hugot gihapon nga ipatuman ang mga health protocols sa mga magaabot sa ciudad.
Suno diri, may yara sang duha ka swabbing booth sa ginadungkaan sang fast craft vessel kag magapaidalum sa mandatory swab test ang mga pasahero.
Ginakabig man sini nga maayo nga development ang nasambit nga tikang bangud malawig-lawig man nga gindumilian ang pagbyahe halin kag padulong sa Iloilo City bangud sa virus.
Nagpang-abiso man ini nga mamati lang sa radyo kag maghulat sa pronouncement sang Bacolod City government sa response sini sa nasambit nga memorandum.
Kaina sang kaagahon, nagpagwa sang statement ang alkalde sang syudad sang Bacolod angot sa pagbalik sang biyahe padulong sa syudad sang Iloilo vice versa.
Santo sa statement sang alkalde, ginabaton sini ang arrangement epektibo gilayon bangud pareho ang quarantine status sang Bacolod kag Iloilo kag nagpasugot naman si Mayor Jerry Treñas sa pag-umpisa sang pagbalik sang sea travel sa tunga sang duha ka syudad.
Apang pagasundon ang istrikto nga pag-obserbar sang National Inter-Agency Task Force health protocols kag subject sa dugang nga agreements nga himuon pa sa natalana nga pagsinapol sa MARINA kaupod ang Philippine Coast Guard, Philippine Ports Authority, Iloilo City kag Bacolod City kag mga shipping companies.
