Nagalaom ang commander sang Coast Guard Station Negros Occidental nga makadihon na sa mas madali nga panahon sang One Western Visayas protocol ang Regional Inter-Agency Task Force (RIATF) angot sa pagbalik sang sea travel sa Bacolod-Iloilo vice versa.
Ini ang kasunod sang pagpagwa sang Executive Orders sang duha ka mga ciudad nga nagatugot na sa pagbalik sang biyahe sang mga sakayang pandagat.
Sa interview sang Bombo Radyo Bacolod kay Commander Jansen Benjamin, ginpahayag sini nga isa sa mga issue nga ginpadangat sang mga shipping companies sa ila sinapol kahapon amo nga may yara sang mga confusions sa duha ka Executive Orders.
Suno kay Benjamin, ang kada LGU ang may yara sang kinaiya nga pagsulundan.
Gani ginrekomendar nga magdihon ang RIATF sang One Western Visayas protocol.
Suno sa pinuno sang PCG Negros Occidental, yara na karon ang bola sa RIATF angot sa sundon nga protocol sang rehiyon agud nga indi ma-confuse ang mga shipping companies subong man ang mga biyahero kag sila mismo sa Coast Guard.
Gin-athag man ni Benjamin nga ang mga pasahero nagikan sa Iloilo City nga magapadulong sa probinsya sang Negros Occidental lang ang ipaidalom sa mandatory swab testing pagpanaog sa barko.
Samtang, ang tanan naman nga mga pasahero nga pagwa ukon pasulod sa ciudad sang Bacolod ang dapat nga rehistrado sa Bacolod City Covid-19 Contact Tracing (BaC-Trac) system.
Sa karon suno kay Benjamin, wala pa sang exact date kun san-o maga-resume ang biyahe sang mga fastcraft bangud nga indi pa handa ang mga shipping companies.
Suno sa iya, kinahanglan pa nga tipunon liwat sang mga shipping companies ang ila nga manpower bangud kalabanan sa mga empleyado sang mga ini ang yara sa bakasyon ukon naka-layoff.
