BACOLOD CITY-Ginkompirmar sang pinuno sang Coast Guard Station-Negros Occidental nga wala pa nagbalik ang biyahe sang fastcraft subong nga adlaw.
Sa interview sang Bombo Radyo Bacolod kay Commander Jansen Benjamin, ginpahayag sini nga Ocean Jet pa lamang ang nakapadala sang sulat sa opisina sini nga indi ini makabalik sang biyahe bangud yara pa sa Cebu ang barko agud ipakay-o.
Apang ang Supercat kag Weesam ang wala pa nakahatag sang sulat sa opisina sini angot sa pagbalik sang biyahe.
Suno kay Benjamin ginpalantaw man sini sa mga tinawo niya ang Bredco port kag nakita nga wala sang nagpila nga mga pasahero agud mag-gawad sang ticket.
Nagpanugyan man ini sa mga locally stranded individuals (LSIs) kag authorized persons outside residence (APOR) nga sa tion nga indi makasakay sa fastcraft may option ang mga ini nga magsakay sa RORO.
Samtang, pagalantawon kag imonitor man sini ang pronouncement sang presidente kag national inter-agency task force (IATF) agud mahibaluan kun ano na nga quarantine status ang probinsya sang Negros Occidental kag syudad sang Bacolod matapos ang Hunyo 15.
