Gin-athag sang station commander sang Coast Guard Station-Negros Occidental nga wala nila gin-angkon nga sila ang nakarescue sang 22 ka mga tripulante sang FV St. Peter The Fisherman II, ang fishing vessel nga naglugdang sa tunga sang Sicogon Island sa Carles Iloilo kag Cadiz City, Negros Occidental.
Suno kay Captain Ludovico Librilla, wala nila gin-angkon ang pagrescue sa 22 ka mga crews bangud ang nagrescue amo ang crew sang skiff boat nga kaupod sang St. Peter II kag ginsaylo sa isa pa ka fishing vessel sang kompanya kag gindala sa Cadiz City.
Sa pihak nga bahin, nagapalab-ot sang simpatiya ang Philippine Coast Guard sa pamilya sang mga missing nga mga tripulante sang naglugdang nga barko.
Ginpahayag man sini nga kahapon nagpatigayon sila sang aerial inspection sa lugar kag surveillance gamit ang barko sang coast guard.
Suno kay Librilla wala man nila ginpasaluman anay ang lugar nga ginlugdangan sang barko bangud wala pa sila nakahibalo sang kadulumon sang ginlugdangan sang barko.
