Preparado na ang Coast Guard Station-Northern Negros Occidental sa ginalauman nga pagdagsa sang mga tawo sa mga coastal areas kag beach resort sa pagselebrar sang kapiyestahan ni San Juan Bautista bwas nga adlaw.
Sa interview sang Bombo Radyo kay Lieutenant Junior Grade John Hoffer Olis, Public Information Officer sang Coast Guard Station-Northern Negros Occidental, may 78 ka mga coast guard personnel ang gindeploy sa mga coastal areas kag beach resorts.
Suno diri, nagconduct naman sila sang inspection sa mga resorts kun sa diin strikto ang ila pag-tsekyar sa mga lifeguard, rescue equipment, emergency response kag medical kit.
Naka-comply naman ang tanan nga inspect nila apang nagparequire lamang sila nga dapat naka-uniform ang mga lifeguard kag dapat may mga warning signs.
Nagpahanumdom naman ini sa tanan nga maghalong kag likawan nga maligo samtang yara sa impluwensya sang makahulubog nga ilimnon.
