Ginpasalig sang Coast Guard Station Southern Negros Occidental nga sila ang magapadayun sa search and retrieval operations sa mga missing tubtob nga wala pa ginakanselar sang local government unit ang operasyon.
Sa interview sang Bombo Radyo Bacolod kay Lt Junior Grade James Carbajosa, commander sang Coast Guard Station Southern Negros Occidental, may-ara sang 122 ka mga PCG personnel nga nakadeploy gikan sa ila nga station, samtang may augmentation man nga 18 ka personnel gikan sa Dumaguete kag anom ka personnel gikan sa Coast Guard Special Operation Group Southern Visayas.
Sila ang nagapatigayon sang search and retrieval sa La Castellana kag Moises Padilla samtang naga-assist naman sa relief operation sa Binalabagan kag Himamaylan City.
Sa Southern Negros Occidental, 40 na ang narecover nga bangkay nga ginalakipan sang 14 sa La Castellana, 10 sa Moises Padilla, walo sa Hinigaran, anom sa Binalbagan, kag tag-isa sa Himamaylan kag Kabankalan City.
Apang ini ang indi lamang recoveries sang PCG, bangod sila ang nagabulig lamang upod sa LGUs kasubong man ang iban nga units kaangay sang Philippine Army, Bureau of Fire Protection kag Philippine National Police.
Apang aminado si Carbajosa nga ang Philippine Army lamang ang nagadeploy sang K-9 units bangod wala sang K-9 units ang PCG Southern Negros Occidental.
Wala man ang mga ini sang earial drones, sa baylo sila ang nag-augment naman sang truck nga gikan sa PCG Southern Visayas, kasubong man ang Hilux kag duha ka floating assets gikan sa PCG Southern Negros Occidental.
