Gin-islan sang ginbansagan nga “Monster ship” sang China kahapon, Sabado, Pebrero 1 ang China Coast Guard vessel 3304 nga iligal nga nag-operate malapit sa Zambales.
Sa isa ka statement nga ginpagwa kagab-i, ginpahayag ni Philippine Coast Guard spokesperson for the West Philippine Sea Commodore Jay Tarriela nga madinalag-on nga natabog sang BRP Teresa Magbanua ang CCG 3304 nagikan sa coastline sang Zambales kag epektibo nga napabilin ang barko sang Pilipinas ang distansya sang monster ship nga ginabanta nga yara sa 110-115 nautical miles nagikan baybayin sang Zambales.
Nagapabilin man nga wala nagakalingkang ang crew nga sakay sang BRP Teresa Magbanua sa presensiya sang tuman ka dako nga barko sang China kag nagpakita sang kaisog kag nagapanindugan.
Kaangot sini padayon nga ginapanindugan sang PCG nga illegal ang mga tikang sang CCG kag paglapas sini sa United Nations Convention on the Law of the Sea (UNCLOS) kun sa diin isa ang China sa nagpirma.
