Ginpatuman na sang provincial government sang Negros Occidental ang Code White Alert status nga mandu sang Department of Health (DOH) angot sa pagsaulog sang Christmas kag New Year.
Ang mando ang ginpadala ni Department of Health Western Visayas-Regional Director Dr. Adriano P. Suba-an nga nadirekta sa tanan nga mga ospital sa Western Visayas.
Sa Negros Occidental, siyam ka mga hospital ang ginpaidalom sa Code White Alert status..
Suno kay Dr. Mary Ann Maestral, Chief of Hospital sang Teresita Lopez Jalandoni Provincial Hospital, ang Code White amo ang preparasyon sang mga ospital halin December 20, 2023 tubtob January 4, 2024.
Ini agud nga ipaalerto ang mga personnel sang ospital sa ti-on nga may kaso nga magluntad angot sa selebrasyon kun sa diin may kumpleto nga preparasyon para sa medical kag surgical supplies sa mga biktima nga magdangat sa ospital.
Suno kay Maestral, ang mga district hospital sa probinsya ang may sistema nga ginasunod sa ti-on nga gutok ang mga pasyente sa isa ka ospital, ang pinakamalapit nga ospital amo ang maga-cater sini.
Pahayag pa ni Maestral nga ang Hospital Operation Department (HOD) nagakabig nga ang pinaka-crucial nga operasyon sang mga ospital amo ang second week sang January bangud diri may madamo sang pasyente nga ginadala sa ospital resulta sang selebrasyon.
Panawagan ni Maestral sa mga pumuluyo nga kun mahimo malikawan nalang ang paggamit sang palupok agud nga malikawan ang mga firecrackers related incident.
Panugyan man ni Maestral nga siguruhon nga matinlo ang pagpreparar sang pagkaon kag likawan man ang pagtago sang mga pagkaon kaangay sang pasta nga madasig mapan-os
