Madamo sa atun ang mahuyugon mag-inum sang kape, apang paano kun ang bili sang kape tuman ka mahal? mangape ka pa ayhan ang mga coffee lovers?
Sa Dubai isa ka Emirati coffee shop ang liwat nga nakahimo sang record paagi sa pagbaligya sang tuman ka mahal nga kape.
Ang Roasters, isa ka posh coffee, nga may apat ka branches sa Dubai kag 11 ka branches sa United Arab Emirates (UAE), ang bag-o nga Guinness World Record holder matapos nga nagbaligya sang isa ka serbe sang kape sa presyo nga 2,500 dirhams ukon $680, nga magadangat sa P39,400 kun iconvert sa Philippine currency.
Sang September 13, sa flagship location sang kumpaniya sa Boulevard Downtown Dubai, ang staff sang Roasters ang nagserbe sang kape nga ginpreparar gamit ang V60 method kag ang suludlan ang himo sa Edo Kiriko crystal glass nagikan Japan, nga kilala sa mga manami kag pinasahi nga patterns.
Ang brew ang himo man sa pinasahi nga Panamanian Geisha beans nagikan sa kilala nga Hacienda La Esmeralda farm sa Panama, kag ginserbe kaupod sa tiramisu kag chocolate ice cream nga gin-infused man sang Geisha beans.
Ang pangalan sang kliyente nga nagbakal sang tuman ka mahal nga kape ang wala ginbuyagyag sa publiko apang gin-promote sang Roasters ang hitabo bilang kabahin sang marketing efforts kaupod ang co-founder and chief executive officer Konstantin Harbuz nga nagpahayag nga ang Guinness Record ang isa ka pagkilala kag pagselebrar sang dedikasyon sang team.
Ini ang nagapakita man nga ang Dubai ang destinasyon sang tumalagsahon nga coffee experience.
