Nadakpan ang duha ka mga holdupper samtang nakapalagyo naman ang isa pa kasunod sang hold-up incident sa Purok Talong, Barangay Malingin, Bago City, Negros Occidental alas-3:30 kahapon sang hapon.
Sa interview sang Bombo Radyo kay Police Staff Master Sgt. Mars Anthony Luto, imbestigador sang Bago City Police Station, lending collector sang Elite Lending Services ang biktima nga si Gerald Estroche, 41 years old, kag a residente sang Barangay Pacol, Valladolid, Negros Occidental.
Samtang ang mga suspetsado naman amo sanday Joshua Getino, 21 years old, single, jobless, kag residente sang Purok Newton, Barangay Taloc, Bago City; Mardin Sahil, 25 years old,single, jobless, kag residente sang Purok Newton, Barangay Taloc, Bago City; kag Mark Guzon, residente sang Purok Irrigasyon, Brgy. Taloc, Bago City.
Suno kay Luto, nagpahibalo sa ila si Francisco Belleza, Deputy Tanod Commander sang Barangay Malingin, nga may yara sang hold up incident sa Purok Talong, Barangay Malingin, Bago City gani nagpatigayon sila sang hot pursuit operation nga nagresulta sa pagkaaresto nanday Getino kag Sahil.
Santo sa pag-usisa sa biktima nga si Estroche, nagamaneho ini sang motorsiklo kag naglabay sa rough road sa tunga sang kamo sang tubo sang hinali lang nag-ulhot ang tatlo ka mga persona kag siya ang ginlampusan sang pusog gani nahulog ini sa motorsiklo.
Gintaban sang mga holdupper ang cellphone sang biktima nga nagabalor sang P10,000 kag cash collection nga P4,000 antes nagpalagyo padulong sa Brgy. Busay, Bago City paagi sa paglabay sa sugarcane plantation.
Sang nakagwa na sa katubuhan ang mga suspects, nadakpan sanday Getino kag Sahil samtang at large pa sa karon si Guzon nga amo ang nagdala sang kwarta.
Nagapabilin pa sa ospital ang biktima nga si Estroche.
