Ginpahayag sang pinuno sang Bacolod City Investigation and Detective Management Unit nga nagapanindugan ang college student nga biktima sang alleged abduction sa Bangga Patio, Burgos St., Barangay Villamonte, ciudad sang Bacolod nga matuod-tuod ang abduction case.
Sa interview sang Bombo Radyo Bacolod kay Police Lt. Col. Joery Puerto, personal sini nga ginpadulungan sa banwa sang Binalbagan, Negros Occidental ang college student nga ginapahayag nga biktima.
Suno kay Puerto, naestorya niya ini kag nagasanto man ang pahayag sang bata sa nauna nga ginpahayag.
Suno diri, makita nga may yara sang natabo sa estudyante bangud samtang naestorya may tion nga nagatulo nalang ang iya nga luha kag nabudlayan na nga isaysay ang natabo.
Dugang pa sini nga makita nga natrauma ang bata.
Santo sa panaysayon sang biktima, nakapalagyo ini bangud nagpundo ang van nga ginasakyan sang mga ini kag naglalisay ang apat ka mga lalaki sa pagpakay-o sang van, kun sa diin ginbuksan sini ang piyertahan kag nagpanago sa madamol nga hilamonan.
Wala man ini gilayon nagtabok sa pihak sang dalan kag nagpangayo pa ini sang bulig sa mga nagabiyahe sang tricycle apang wala siya ginsapak kag nakakita man ini sang nagasiga nga flashlight gani nagtabok ini didto tubtob nga siya ang nabuligan sang mga bata nga nagapanulo sang damang.
Personal man nga ginkadtuan ni Puerto ang lugar nga ginpanaugan sang biktima, kun sa diin nakita man niya ang madamol ang hilamonan nga sarang gid mapanaguan.
Ginpahayag man nga may kuhaon pa kuntani sa Dalan Lacson ang mga gina-alegar nga nag-abduct diri.
Sa karun, palaligban kun ano ang rason sang gina-alegar nga pag-abduct sa college student.
Suno kay Puerto, mahimo nga natuon sa blind spot ang lugar sa Burgos Street kun sa diin natabo ang gina-alegar nga abduction gani wala makuhaan sang CCTV footage.
Ginklaro man sini nga indi pa kumpirmado nga abduction ang natabo bangud padayun pa ang ila nga imbestigasyon.
