Seryoso na ang Land Transportation Office Bacolod sa pag-implementar sang pagpangdakop sa mga colorum nga mga pampubliko nga salakyan.
Suno kay LTO Bacolod head Renato Novero, bangod naka-issue na ang Land Transportation Franchising and Regulatory Board sang Provisional Authority para sa mga traditional jeepneys, agud mangin patas sa tanan, ila na nga pasanyogon ang pagpanakop sa mga nagabyahe sang colorum.
Apang, aminado man ini nga kulang ang tawo sang LTO gani nakig-angot ini sa Local Government Unit sang suporta paagi sa Bacolod Traffic Authority Office kag Highway Patrol Group.
Suno kay Novero, ang madakpan nga wala sang PA, iga-impound ang salakyan kag pamultahon sang P120,000.
Nakatigayon naman ini sang pagpanakop sang Hulyo kun sa diin apat ka drayber ang nadakop nga nakumpiskaran sang unit.
Ginalantaw nga matigayon sa masunod nga semana ang pag-implementar sa pagdakop sa mga colorum nga traditional jeepney.
Nagpanugyan si Novero sa mga maisog nga nagabyahe sa gihapon sa dalan nga wala sang Provisional Authority nga indi na magbyahe bangod wala na sang pagduha-duha sa Land Transportation Office Bacolod sa pagdakop sa ila.
