Aminado ang election officer sa ciudad sang Bacolod nga nangin madugay ang pagproseso sa katapusan nga adlaw sang filing sang Certificate of Candidacy kahapon.
Ini bangud pila sa mga political aspirants ang may kulang-kulang sa ila mga requirements sa ginfile nga COCs.
Madumduman nga kahapon nagfile sang COC ang Team Asenso sa pagpanguna ni Bacolod City Mayor Alfredo “Albee” Benitez nga magapapili bilang representative sang Bacolod City Lone District kag ni Congressman Greg Gasaya nga magapapili bilang alkalde sang ciudad samtang bise alkalde naman ang pagapapilian ni Councilor Kalaw Puentevella.
Sa interview sang Bombo Radyo Bacolod kay Atty. Revo Sorbito, election officer sang Bacolod City, ginakalipay sini nga natapos ang filing sang COC nga malinong kag matawhay apisar pa nga madamo sang supporters ang nag-upod sa mga political aspirants nga nagfile sa katapusan nga adlaw sang COC filing.
Sa Team Asenso si Mayor Albee Benitez, Congressman Greg Gasataya kag Councilor Kalaw Puentevella kaupod ang siyam ka mga konsehal ang nagfile sang ila nga COC.
Apang ang tatlo sa anum ka mga konsehal ang nauna na sa pagfile sang ila nga COC.
Samtang gin-athag man sini nga nakahingagaw man file sang COC si Archie Baribar kag anay konsehal Jun Gamboa nga lunsay magapapili bilang konsehan sang ciudad sa 2025 midterm elections.
Suno kay Sorbito may mga kulang lamang sa dokyumento sang duha ka mga aspirants gani gincomply nila ini kag natigayon naman nga mafile antes pa man magtakop ang office hours sang COMELEC.
Ang mga kulang-kulang man sa COC ang rason nga nagakadugayan ang mga political aspirants sa pagfile sang ila nga COC apang sa pihak sini wala man sang recorded nga nagluntad nga insidente may kaangtanan sa COC filing.
