BACOLOD CITY — Nagakahangawa ang Commission on Elections sa ciudad sang Bacolod nga mahimo kulangon ang mga miyembro sang electoral board nga magaserbe sa adlaw sang eleksyon sa Mayo 14 subong nga tuig.
Suno kay Bacolod City Election Officer Atty. Mavil Majarucon-Sia, mga manunudlo ang ginakuha halin sang una nga nagaserbe sa electoral board.
Apang ini ang labing una nga eleksyon nga magaepekto na ang layi nga nagamandu nga indi na compulsory ang pagserbe sang mga manunudlo sa tion sang eleksyon.
Suno kay Sia, madamo ang mga maestra kag maestro nga nahadlok magrisgo sa tion sang piniliay.
Prayoridad kuntani sang Comelec suno kay Sia ang mga miyembro sang Department of Education bangud may eksperyensya na sila sa tion sang eleksyon.
Sa tion nga kulangon ang mga manunudlo suno sa election officer, magahingyo ang City Comelec Office sang bulig sang mga empleyado sang gobyerno ukon sa mga manunudlo sa pribado nga mga eskwelahan.
Sa bilog nga ciudad, may yara sang 846 ka clustered precincts.
Suno kay City Schools Division Superintendent Cynthia Demavivas, pag-engganyo lamang sa mga manunudlo ang mahimo sang DepEd kag indi ini makapamilit.
Wala naman sang problema ang Commission on Elections Negros Occidental may kaangtanan sa numero sang mga manunudlo nga magaserbe sa electoral board sa Barangay and Sangguniang Kabataan elections sa bulan sang Mayo.
Suno kay Provincial Election Supervisor Atty. Jessie Suarez, ciudad sang Bacolod ang may kaangay sini nga problema kag ginatinguhaan naman ni City Election Office Atty. Mavil Majarucon-Sia nga masolbar.
Sa tion nga kulangon gid suno kay Suarez, may iban man nga mga options nga sarang magamit agud nga makumpleto ang electoral board.
Suno kay Suarez, magasugod na sa Abril 14 tubtub Mayo 24 ang election period.
Ang filing sang Certificate of Candidacy ang patigayunon humalin Abril 14 tubtub 20 samtang Mayo 4 tubtub Mayo 12 naman ang campaign period.
Manual ang binotohay sa barangay kag SK, halin alas 7:00 sa aga tubtub alas 3:00 sa hapon.