Nagpasalig ang Commission on Election – Bacolod nga indi na maliwat ang natabo nga pagginutok sang mga voter’s registrant kahapon.
Ang 10-day voter’s registration para sa Barangay and Sangguniang Kabataan Elections nag-umpisa sang Agosto 1 kag magatakop subong nga adlaw, Agosto 10.
Nagdangat sa kapin sa 961 ang natigayon nga nakaaprehistro kahapon.
Sa interview sang Bombo Radyo Bacolod kay Bacolod City Election Officer Atty Katrina Trinio Caña, ginalauman sini nga mas madamo pa gid sang maparehistro subong nga adlaw, ang ulihi nga adlaw sa pagparehistro.
Suno diri, iya ginapasalig nga indi na maliwat ang natabo kahapon.
Nagkoordinar na sila sa management sang mall kag nangayo sang assistance sa pulis.
Pahayag ni Caña, kahapon sang aga, may yara na sang pila sa gwa sang mall apang sang pasudlon na ang mga regsitrants amo na nga nagginutok kag iban naglumpat sa barikada kag nagsal-ot sa pila.
Dugang pa sini, iya ginapanugyan sa mga ginikanan nga pabay-an na lamang ang mga bata nga magpila sang insakto sang sa sugo-on nga magsal-ot sa pila.
Liwat man sini nga ginpanugyan nga kumpletohon ang requirements agud wala na sang delay pa.
Samtang, kagab-i pa lamang may yara na sang nag-umpisa sa pagpila para magparehistro.
Alas- 8:00 sang gab-i kagab-i, may mga ginikanan na nga nagpila kag iban sa ila nagpahayag nga pila ka bes na sila maglinya sang kaagahon apang makapila man ka beses nga wala nakakuha sang slot.
