Nagpatigayon kahapon sang final briefing si Bacolod City Election Officer Katrina Trinio Caña sa tanan nga mga concerned agencies kag units nga imbulbado sa Barangay and Sangguniang Kabataan Elections 2023.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company, ginpresentar sang representative gikan sa Philippine Army ang Insurgency Situation, samtang ang Philippine Drug Enforcement Agency ang nagpresent naman natuhoy sa drug situation sa ciudad.
Ang Philippine Coast Guard ang nagpresent man sang sitwasyon sa kadagatan samtang ang Bacolod City Police Office ang nagpresentar sang peace and order situation.
Suno diri, preparado na ang BCPO para sa Barangay and Sangguniang Kabataan Elections 2023 kun sa diin may ara sang tag-duha nga police personnel nga iga-augment sa 47 ka mga voting precincts.
Magluwas sa 94 ka mga igadeploy nga kapulisan, may mabilin naman nga 12 ka police personnels sa Police Stations nga mangin responsible sa opisina samtang ang Bacolod City Mobile Force Company ang magapadala naman sang 9 tubtob 10 ka bag-o nga mga kapulisan nga wala pa sang familiarity agud magbulig sa tagsa ka police stations sa pag-implementar sang election rules kaangay sang Kontra Bigay, Liqour Ban kag illegal campaigning sa tion sang election day.
May-ara man sang apat ka mga patrol cars ang Special Weapons and Tactics (SWAT) sang BCPO nga ipreposition sa apat ka areas sa ciudad sang Bacolod agud maseguro ang malinong kag patas nga eleksyon sa 61 ka mga Barangay sa ciudad sang Bacolod.
