Wala sang may nagfile sang Certificate of Candidacy sa Commission on Elections- Bacolod kahapon nga amo ang ikatatlo nga adlaw sang filing.
Sa interview sang Bombo Radyo Bacolod kay Election Officer Atty Revo Sorbito, sa una nga duha ka adlaw sang filing sang COC, duha pa gid lamang ang nagpadulong sa opisina sang Liga ng mga Barangay para magpasa.
Madumduman nga sang Oktobre 1 nagfile si anay Bacolod City Mayor Evelio “Bing” Leonardia para magpapili bilang congressman sang Lone District sang Bacolod City kag pagkasunod nga adlaw, Oktobre 2 nagfile naman sang COC si Romy Gustilo para sa amo man nga posisyon.
Suno kay Sorbito, may nagpaschedule na sa ila para sa Oktobre 5 kag 8 apang ginalauman nga may yara pa sang pagbag-o diri.
Ginalantaw naman sini nga pagpanghangkat amo ang posibilidad nga magkaproblema ang filing sang COC sang mga aspirants nga magafile sa ulihi nga adlaw kag indi na makahingagaw pa nga makaproseso.
Amo nga ginpanugyan sini nga kumpletohon ang dokumento kag mahimo man nga ipatskeyar na sa ila ang dokumento sang timprano bisan nga indi pa opisyal nga magfile sa amo nga adlaw.
Gin-athag man sini nga mahimo pa sang kandidato mag withdraw tubtob sa Oktobre 8 kag siya ang buslan sang kaupod sa partido apang kun indipendent naman, indi na mahimo pa nga buslan ang nagwithdraw nga kandidato.
Suno kay Sorbito, matapos ang filing sang COC, magapreparar na ini sang reports kag bitbiton ang COC’s sa main office.
Samtang, lauman man nga matapos ang Election Registration Board (ERB) amo na kag ipagwa ang official nga lista sang naaprubahan nga nagparehistro nga mga botante.
