Gin-athag sang chairman sang Commission on Election nga indi mapatuman ang request para sa pagpatigayon sang manual counting kag tallying sa eleksyon.
Madumduman nga ginpahayag ni Congressional Candidate former Bacolod City Mayor Evelio “Bing” Leonardia nga sila ang nagsumiter na sang sulat sa COMELEC nga nagahingyo sa pagpatigayon sang manual counting kag tallying bangod sa pagduda sa posibilidad sang kamala-malahan sa resulta sang piniliay.
Ini kasunod sang Public Private Partnership agreement sang Bacolod City Government sa Highdata Infra Corporation nga konektado sa SMS Global Technologies Inc. nga amo ang incharge sa Overseas voting.
Sa interview kay Comelec Chairman George Erwin Garcia, sa idalom sang layi sa eleksyon ukon Republic Act 9369, ang Pilipinas ang nagsugod na sang full automated election halin sang 2010.
Halin sadto, bisan isa ka Barangay ukon bisan sa isa ka polling precinct wala sang may natabo nga nag-manual counting.
Paathag ni Garcia, nga indi mapatuman sang COMELEC ang request bangod kinahanglan pa nga maligwat ukon amyendahan ang layi.
Pahanumdom sini nga wala sang gahom ang COMELEC sa paghimo sang layi, sa baylo sila ang tagapatuman lamang.
Kag sa paghuman sang layi, ini ang may kaupod man dapat nga dugang nga budget.
Apang sa pihak sini, ginpasalig ni Garcia nga may random annual audit nga patigayunon, kun sa diin kada distrito may isa ka ballot box, kag ini ang manual nga isipon agud malantaw kun husto ang resulta nga ginapagwa sang makina.
Suno diri, hybridized ang makina, magluwas sa makaprint sang election return ini ang nagatransmit man sang result, kag ang ballot image nga nahulog halin alas-5:00 sang aga tubtob alas-7:00 sang gab-i ang sarang makita sang mga poll watchers.
Sarang man nga mapicturan ukon mavideo ang ipagwa nga resulta.
Ginapaseguro man ni Garcia nga bag-o tanan ang gamiton nga Automated Counting Machines, indi kaangay sa gingamit sang 2022 nga makatatlo na nga nagamit sa eleksyon.
Ginpasalig man sini nga nademo nila ang tanan nga ACMs halin Disyembre 2 tubtob Enero 30 kag wala sang may nakita nga problema.
