Nagpanindugan si COMELEC Commissioner Rowena Guanzon nga wala ini nagpamahog sa mga gwardiya sang Golden Crest Subdivision sa Barangay Bata, Bacolod City kahapon.
Ini ang kasunod sang ginaalegar pagpamahog sini sa mga gwardiya sang amu nga subdivision bangud nga daan na ang iya nga sticker.
Sa interview sang Bombo Radyo Bacolod kay Homeowners Association President Larry Decena, ginpahayag sini nga namilit gid si Guanzon nga magsulod sa subdivision.
Pagkaligad sang kapin 30 minutos, nagbalik ini sa mga gwardiya kag ginaalegar nga iya ginyawyaw kag ginpahog.
Dugang pa ni Decena nga naglakat si Guanzon kag pagbalik sini may yara na siya sang upod nga mga pulis.
Nagpadulong sila sa Bacolod Police Station 3 kag pareho nga nagpablotter ang duha ka kampo.
Nagpadulong man ang mga miyembro sang Homeowners Association sa istasyon sang Bombo Radyo agud magpadangat sang report.
Handa naman si Decena nga atubangon ang ano man nga kaso nga ipasaka sang commissioner batok sa ila.
Sa interview sang Bombo Radyo, nagpanindugan si Guanzon nga wala ini namahog sa mga gwardiya kag wala man ini sang armas.
Suno sa iya, padulong ini kuntani sa balay sang iya utod sa nasambit nga subdivision apang indi ini pagpasudlon sang watchman bangud wala sang sticker ang iya salakyan.
Suno sa commissioner, nanaog ini sa salakyan kag ginhambalan ang watchman nga tsekyaron ini bangud January tubtob December 2020 ang validity sang sticker, apang ginhambalan siya nga hulaton lang ang ila nga boss.
Suno sa iya, pag-abot ni Decena, yara sa liog ang iya nga facemask kag apisar nga ginhambalan niya nga suksukon ini sang tadlong, wala ini namati kag padayon lang sa pagpalapit kag pag-akig sa iya.
Ginpahayag man sini nga wala nagpahibalo si Decena nga presidente ini sang home owners association kag nagpakilala lang bilang general.
Suno kay Guanzon, pasakaan sini sang kaso nga pabayolar sa EO 35 ukon ang city ordinance tuhoy sa pagsuksok sang facemask kag Bayanihan to Heal As One Act si Decena bangud naga-agsik ang laway sini kag padayon sa pag-arangka sa commissioner apisar nga naga-atras na siya.
Ginhambalan sini ang retired general nga maakusar ini apang wala siya namahog bangud suno sa iya, kinamatarong sang tagsa-tagsa ang magpadangat sang reklamo sang mga otoridad.
Suno sa iya, wala niya gingamit ang iya puder bilang isa ka commissioner sa insidente kundi bilang isa ka homeowner.
Nagapati man ini nga tinutuyo ni Decena nga i-intimidate siya bangud nakahibalo ini sang iya posisyon, apang suno diri, indi sini mabaton nga ginpakahuy-an siya sa atubangan sang mga tawo kag ginlapakan ang iya kinamatarong gani wala ini sang plano nga magpaareglo.
