Nagpangayo sang clearance ang Commission on Elections Bacolod kaupod ang Sangguniang Kabataan Federation sa Emergency Operations Center agud makaschedule sang sattelite voters registration.
Sa interview sang Bombo Radyo kay Bacolod COMELEC Head Atty. Kathrina Trinio Caña, ginpahayag sini nga may lima ka mga schedules ang sattelite registration diri sa ciudad kun sa diin natapos na ang tatlo.
Una ini nga ginhiwat sang Hunyo 25 kag 26 sa SM City Bacolod kag sa City Mall Mandalagan naman sang Hulyo 3.
Sa palaabuton nga Hulyo 9 kag 10, liwat nga patigayunon ini sa SM City Bacolod.
Suno kay Caña, sa tatlo ka nauna na nga sattelite registration, nagdangat sa masobra 1,000 ang kabug-usan nga nakaparehistro.
Suno diri, nagrequest man ang SK Federation kun sarang man sila nga makapatigayon sini para sa mga kabataan nga maga-edad 18 anyos sa palaabuton nga eleksyon.
Sa karun ginahulat pa ang requirements nga ila ipasa, kag kun ini ang maaprubahan sang EOC, amu pa ang pagtalana sang schedule kag lugar nga pagahiwatan sini.
