Ginpahayag sang Commission on Elections kahapon nga may yara sang hungod nga nag-edit sang litrato sang overseas ballot agud pagwaon nga wala sa listahan sang mga kandidato ang pangalan ni Vice President Leni Robredo.
Suno sa statement sang Comelec, ginakumpirmar sang Office for Overseas Voting (OFOV) nga ang litrato nga nagapakita sang official ballot nga ginbaton sang isa ka overseas voter sa New Zealand ang hungod nga gin-edit agud pagwaon nga wala ang pangalan ni Robredo sa listahan sang Presidential candidates.
Suno sa Comelec, nagapakig-angot ang OFOV sa Department of Foreign Affairs kag Philippine Embassy sa New Zealand agud matumod ang persona nga responsable sa pag-edit sang litrato kag pagpalapta sini sa social media.
Sang Domingo, ginpahayag ni Comelec Commissioner George Garcia nga “fake news” ang nasambit nga litrato nga nagviral kag nagalapta.
Suno diri, isa lamang ang template nga ginagamit sa 2022 elections ballot sa New Zealand kag serialized ang mga ini.
Suno sa opisyal, madamo na sang fake news nga nagalapta sa krun kag madamo na sila sang may ginrefer sa National Bureau of Investigation.
Antes ini, nagtukod ang Comelec sang Task Force Kontra Fake NEws agud batuan ang mga sala nga impormasyon tuhoy sa Eleksyon nga makaguba sa integridad sang piniliay.
Nagsugod sang Abril 10 ang overseas voting para sa 2022 elections nga magadugay tubtob Mayo 9.
