Amat-amat na nga ginplastar sang Commission on Elections sa Negros Occidental ang mga kinahanglanon para sa Barangay and Sangguniang Kabataan Election sa Oktobre.
Sa interview sang Bombo Radyo Bacolod kay Negros Occidental Provincial Election Supervisor Atty. Ian Lee Ananoria, sila ang amat-amat na nga nagakoordinar sa tanan nga mga stakeholders kag sang Martes nakig-angot na sila sa Comelec Regional Office kasubong man sa Philippine National Police (PNP) kag Armed Forces of the Philippines (AFP).
Ginpadala naman gikan sa Manila ang mga election paraphernalias kag supplies apang ini ang wala pa makalab-ot sa Negros Occidental.
Dugang pa ni Ananoria nga ginalauman nila nga sa Setyembre, makumpleto na ang tanan nga paraphernalia kalakip na ang mga accountable forms kag mga balota.
Sa masami, dungan naman nga ginapadala ang mga election paraphernalia sang Negros Occidental kag Bacolod City.
Pahayag ni Ananoria nga sa Negros Occidental, ang mga paraphernalia ang ginahamtang sa kustodiya sang mga municipal kag city treasurers.
Iban sa mga banwa kag syudad sa Probinsya ang ginsaylo man ang lugar sang filing sang COC kaangay sa Bacolod City nga patigayunon sa malls agud makacater sang mas madamo nga numero sang aplikante.
Madumduman nga ang filing sang COC ang natalana humalin Agosto 28 tubtob Setyembre 2.
Sa pihak nga bahin ang mga Election Officers naman amo ang natalana nga magtrain sa mga electoral boards kag board of canvassers nga gintalana na nila sa weekend sa bulan sang Setyembre.
Sa karun wala pa sila sang listahan sang numero sang mga manunudlo nga magaserbe para sa 660 ka barangay sa Negros Occidental sa maabot nga Barangay and SK Election.
