May panugyan ang regional director sang Commission on Elections-Negros Island Region sa mga supporters sang mga political aspirant para sa 2025 midterm elections.
Ini kadungan sang pagbisita sini sa probinsya sang Negros Occidental kag ciudad sang Bacolod agud nga tsekyaron ang sitwasyon sa nagapadayon nga filing Certificate of Candidacy.
Suno kay Atty. Lionel Castillo, malaba ang panahon humalin sa COC filing antes ang campaign period para sa 2025 midterm elections kag indi malikawan nga may supporters nga magakampanya sang temprano.
Suno kay Castillo, nagaayo ini sa mga supporters nga likawan nga mangin bayolente sa tion nga magkampanya.
Dugang pa sini nga bahala na mag-away sa social media ang mga supporters apang dapat wala lang sang physical nga sakitanay.
Ang election period ang natalana sa January 12 tubtob June 11 samtang ang campaign period para sa senator kag partylist ang natalana sa February 11 tubtob May 10, 2025.
Ang campaign period naman sa local position ang magaumpisa sa March 28 tubtob May 10, 2025.
Ginpahayag man ni Castillo nga ang Negros Oriental pa lang nakita sini para sa election watch list apisar nga mainit man sa Siquijor in terms of intense political rivalry apang wala sang violence.
Sa karun wala pa sang opisyal nga voters list bangud may yara pa sang patigayunon nga election registration board hearing sa October 14.
Ginpahayag man sini nga ang COMELEC ang wala pa sang master list sang mga botante bangud magluwas sa pag-approve sang registration may yara pa ang mga ini sang patigayunon nga clustering sa maximum of 1000 precincts.
