Nagalaom ang Regional Director sang Commission on Election (COMELEC) – Negros Island Region nga mahangpan sila sang mga voter registrants nga malab-utan sang cut-off sa deadline sa Lunes.
Sa interview sang Bombo Radyo Bacolod kay Atty Lionel Marco Castillano, nagbukas ang voter’s registration sang Pebrero 12, kag ini ang magatakop na sa Lunes, Setyembre 30 bangod maga-umpisa naman ang filing sang Certificate of Candidacy sa Oktobre 1 tubtob 8.
Aminado ini nga dako ang ginsaka sang voter’s turnout sumugod subong nga semana bangod malapit na ang deadline.
Sila ang padayun man sa pagrehistro subong nga adlaw bisan Sabado.
Apang paathag ni Castillano nga wala na sang registration bwas, kag magaresume na lamang sa Lunes halin alas-8:00 sang aga tubtob alas-5:00 sang hapon.
Kun magdangat sa alas-4:30 kag may-ara gihapon sang pila, ang mga nagalinya ang ilista na lamang sang Comelec personnel kag iverify.
Paathag sini nga sila ang may-ara man sang limitasyon sa oras kag manpower gani nagalaom ini nga mangin kalmado lamang kag indi magpadala sa init sang ulo ang mga magaparehistro sa last day sang voter’s registration.
Sa karun, nagadangat na sa 200,000 ang mga bag-o nga botante sa Negros Island Region.
Nagalaom si Castillano nga temprano pa magapadulong sa registration site ang mga magaparehistro sa Lunes.
