Kasunod sang ginpagwa nga mando sang Chairman sang Commission on Elections, maga-upod ang Commission on Elections – Negros Island Region sa pagpatigayon sang synchronized Nationwide Grand Baklas Operation sa Biyernes, Marso 28, 2025.
Sa interview kay Comelec – NIR regional director Atty Lionel Marco Castillano, nagmando si COMELEC Chairman George Erwin Garcia kakason ang tanan nga mga ilegal nga campaign posters kag materials sang mga local kag national candidates.
Suno kay Castillano, nagapanawagan man ini sa mga kabarangayan nga kakason man ang mga election campaign materials nga nabutang sa Barangay Halls agud nga indi ang mga ini manabat bangud isa ka election offense ang pagpasugot nga butangan sang election materials ang public office.
Nagpahanumdom man ini nga hugot nga ginadumili sang layi ang pagamit sang government facility, kaangay sang barangay hall, para sa partisan political activity kasubong sang pagpangampanya.
Samtang gin-athag man sini nga indi man apektado sang operasyon baklas ang mga posters nahamtang sa mga pribado nga lugar.
