Magapatigayon sang satellite registration ang Commission on Elections (Comelec) sa Negros Island Region nga maga-umpisa sa Agosto 1 kag magatapos Agosto 10, 2025 para sa palaabuton nga Barangay kag Sangguniang Kabataan Elections sa bulan sang Disyembre.
Sa interview kay Comelec-Negros Island Region Director Lionel Marco Castillano, ang registration sa mga bag-o nga botante ang magaumpisa na kag nagalaom ini nga magaparehistro na ang mga magaboto sa Sangguniang Kabataan.
Suno kay Castillano, ang pagabatunon nga mga registrants ang para lamang sa mga bag-o nga botante para sa Sangguniang Kabataan naga-edad sang 15 tubtob sa 17 anyos, kalakip na ang pag-ilis sang ngalan kag status, correction sa entries sa registration records, reactivation sang registration records, paglakip sang registration records, kag reinstatement sang ngalan sa listahan sang mga botante.
Gin-athag man sini nga ginadumilian ang pagsaylo halin sa isa ka barangay padulong sa isa ka barangay ukon halin sa isa ka banwa ukon ciudad padulong sa iban nga local government units.
Ang registration magasugod alas 8:00 sa aga tubtob alas 5:00 ang takna sa hapon halin Lunes tubtob Biyernes kalakip na ang Sabado, Domingo, kag Holidays.
