Ginapahanumdom ni Commission on Elections (COMELEC) – Negros Island Region Director Atty Lionel Marco Castillano sa mga kandidato para sa May 12 National and Local Elections ang mga guidelines sa pagpangampanya.
Sa interview sang Bombo Radyo Bacolod kay Castillano, maga-umpisa na sa Pebrero 11 ang kampanya sang mga kandidato para sa pagkasenador kag party list representatives.
Suno diri nagpaggwa na ang COMELEC sang listahan sang common posters areas kun diin mahimo makabutang sang campaign materials ang mga candidates.
May yara man sang standard size para sa mga tarpaulins nga dapat indi magsobra sa 2 by 3 feet.
Ila man sa karun tutukan ang papangampanya sa online platforms nga basta wala na rehistro ang account sa COMELEC mahimo nila ini nga matake down.
Samtang sa Marso 28 naman maumpisa ang pagpangampanya sa local level.
Mahibaluan nga sa national level, may yara sang 12 ka senador, 254 ka district representatives, 63 party-list representatives.
Sa local level, may 82 ka gobernador, 82 man ka bise gobernador, kapin sa 800 ka board members, 149 ka city mayors, kag 149 man ka city vice mayors, 1,690 city councilors, 1,493 municipal mayors kag 1,493 man ka municipal vice mayors kag 11,948 ka mga municipal councilors.
