Wala pa sang namonitor ang Armed Forces of the Philippines nga presensya sang bisan ano nga armado nga grupo sa kabug-usan sang Negros Island Region.
Santo sa pahayag ni Atty. Lionel Marco Castillano, regional election director sang Commission on Elections- Negros Island Region, sa meeting nga ginpatigayon sang COMELEC officials kaupod ang mga kapulisan sa Negros Occidental Police Provincial Office (NOCPPO) agud nga diskusyunan ang update sa security preparations sa Negros Island Region para sa 2025 Midterm Elections.
Nahibaluan nga sa maabot nga 2025 midterm elections ang Negros Occidental ang separado na sa Region 6 bangud may yara na sang gintukod nga regional office ang Negros Island Region.
Suno kay Castillano, sa ila nga pagdiskusyon ginpahayag sang katapo sang AFP kag PNP nga wala sila sang namonitor nga presensya sang mga armado nga grupo sa rehiyon.
Suno pa diri wala man sang namonitor nga intense political rivalry sa tunga sang mga politiko sa rehiyon.
Dugang pa sini ang mga kapulisan ang nakapreparar naman sang security measures para sa 2025 midterm elections.
Ginpahayag nga mahimo nga subong nga bulan ukon sa Disyembre makadihon na sila para sa PNP-NIR command, bangud subong yara pa sa Police Regional Office 6 ang command para sa mga kapulisan sa Negros Occidental.
Ang pagtukod sang PNP-NIR ang importante antes pa man magsugod ang kampanya para sa 2025 midterm election.
Kinahanglanon man ini sa pagtukod sang Regional Joint Command Center ukon RJCC bangud sa karun Provincial Joint Command Center pa lang ang natukod.
Ginpahayag man ni Castillano nga wala man sang namonitor nga election hotspot sa Negros Occidental kag Negros Oriental.
Nagalaom man ang election officer nga ang mga ginpadailom sa COMELEC control nga Local Government Units sang nagliligad nga election ang indi na masulit pa sa maabot nga election.
Samtang ang nakita sang mga ini sa karun nga posible makaapekto sa piniliay amo posibilidad sang paglupok sang Bulkan Kanlaon kun sa diin ang mga classrooms nga ginagamit bilang voting centers ang mangin evacuation centers sang apektado nga mga komunidad.
