Whole day gihapon nga magatrabaho ang Commission on Election – Negros Island Region sa Lunes apisar sa deklarasyon sang Malacañang nga half-day lamang ang trabaho sa gobyerno bangod sa ‘Kainang Pamilya Mahalaga Day,’ tubtob nga wala pa napirmahan ni President Ferdinand Marcos Jr. ang hagna sa postponement sang Barangay and Sangguniang Kabataan Election.
Nahibaluan nga santo sa calendar of activity sang COMELEC, sa Lunes, Setyembre 28 naman ang umpisa sang filing sang Certificate of Candidacy.
Sa interview sang Bombo Radyo Bacolod kay COMELEC-NIR Director Atty Arnel Castillano, kun indi gihapon mapirmahan ni Marcos ang ginpasar nga hagna sang Senado kag Kamara, sila ang magapadayun sa mga aktibidad.
Suno diri, ginalauman nila nga may mga banwa kag ciudad sa Negros Island Region nga madamo sang magapapili sa pwesto bilang Barangay kag SK officials, nga magafile na sang ila COC sa una pa lamang nga adlaw sang filing.
Ini man ang rasun nga may mga lugar nga ginsaylo ang venue sa mas malapad nga lugar, bangod ginalauman man nga indi lamang ang magakandidato ang magakadto sa COMELEC, kundi upod sang mga ini ang ila mga supporters.
Sa pihak nga bahin, wala pa nabasa ni President Ferdinand “Bongbong” Marcos Jr. ang hagna nga magapaiway sa natalana nga Barangay at Sangguniang Kabataan (SK) elections sa Nobyembre.
Sa isa ka ambush interview, ginpahayag sang Presidente nga wala pa nakaabot sa iya ang kopya sang hagna.
Sa karun, pirma lamang ni Marcos ang ginahulat agud mangin layi ang Senate Bill No. 2387 nga magahatag sang lima ka tuig nga termino sa mga opisyales sang Barangay kag SK.
