Wala sang pagbag-o sa numero sang election watchlist areas sa probinsya snag Negros Occidental, siyam ka adlaw antes ang eleksyon sa Mayo 9.
Sa interview sang Bombo Radyo kay Provincial Election Supervisor Atty. Roberto Salazar, nagsapol kahapon ang Regional Joint Security Control Center sa ciudad sang Iloilo kun sa diin naghatag sang update sa security preparation ang PNP, AFP kag Philippine Coast Guard.
Suno kay Salazar, naghatag sang commitment ang nasambit nga ahensya sang gobyerno nga sila ang magabulig sa Comelec sa pagpatigayon sang matawhay nga binotohay.
Wala naman sang nagdugang sa numero sang election watchlist areas kundi 18 ka mga banwa kag ciudad sa Negros Occidental ang yara sa EWAs kag ika-19 ang ciudad sang Bacolod.
Sa masunod ng semana, may yara naman sang pagsinapol ang Provincial JSCC agud maplastar ang final preparations para sa Mayo 9.
Sa ulihi nga pagsinapol sa Department of Education, ila ginpahayag nga may gamay nga problema sa pila ka lugar kaangay sang kakulang sang lighting facilities.
Apang naaddress naman ini sang LGUs nga nagpahayag nga ila himuon ang tanan agud indi madulman ang mga botante kun magab-ihan.
May ginhatag naman nga refresher briefings sa mga poll workers nga nagikan sa DepEd.
Suno kay Salazar, 2, 906 precincts ang yara sa Negros Occidental kun sa diin may yara sang Board of Election Inspectors kag may yara sang support staff.
