Ginpahayag sang regional director sang Commission on Election (Comelec) Region 6 nga may patigayunon nga Final Testing kag Sealing isa ka semana antes ang mismo nga eleksyon.
Suno kay Comelec Region 6 Director Wilfredo Jay Balisado, ang Final Testing and Sealing ang patigayunon sa Mayo 2 kag Mayo 7.
Suno diri sa Mayo 2, pahibaluon na ang mga Political Parties kag publiko nga magapatigayon sang actual voting kun sa diin magagamit sang mga test ballot nga kaangay man sa gamitun sa May 9 Election.
Paathag ni Balisado nga bisan sin-o nga registered voter sa isa ka partikular nga presinto ang mahimo makapasakop sa Final Testing kag Sealing.
Matapos nga maprint sang Vote Counting Machine (VCM) ang resulta sa pagboto, may magapatigayon man sang Manual Audit ukon Manual Counting agud matumod kun may mangin deperensya sa resulta.
Suno kay Balisado, may magapaathag naman sa tion nga may makita nga deperensya sa resulta nga ipagwa sang VCM kag sa manual counting.
Paahag sang opisyal nga indi mangin basihan ang numero sang nagboto bangod may iban nga botante nga wala na nagapili sang opisyal para sa pila ka posisyon.
Gani kun may 10 ka mga partisipante, indi man maseguro nga tanan sa mga ini ang magaboto sang alkalde bangod mahimo nga may mag-abstain.
Sa pihak nga bahin, mahimo man nga magkadeperensya sa tion nga may mag-over voting ukon duha ang pilion nga kandidato sa para sa single position.
Paathag ni Balisado nga sa tion nga duha ang ginshade sang botante para sa single position, indi ini pagabasahon sang VCM.
Pasalig naman sini nga basahon gihapon sang VCM kun kulang ang botohon gikan sa mga konsehal ukon board member.
Apang hinali nga magsobra, tanan nga ginpili ang indi na pag-isipon sang Vote Counting Machine.
Panawagan ni Balisado sa publiko nga likawan ang overvoting agud makonsiderar ang tanan nga ginpili nga opisyal.
