Nagapanawagan ang Commission on Elections (Comelec)- Bacolod sa tanan nga luyag magparehistro nga indi na magpaulihi kag maghingagaw na sa pagparegister subong nga semana.
Sa interview sang Bombo Radyo kay COMELEC- Bacolod head Atty Revo Sorvito, tubtob na lamang sa Setyembre 30 ang voters’ registration kun sa diin maga-umpisa na sa Oktubre 1 tubtob sa 8 ang filing sang Certificate of Candidacy.
Suno diri, sa karun mahimo nga makaparehistro sa ground floor sang Robinsons mall-Mandalagan.
Nagadangat naman sa kapin 300 ang mga nagaparehistro kada adlaw humalin alas- 8:00 sang aga tubtob sa hapon kag kalabanan nga nagaduging ang mga nagaparehistro kada udto tubtob sa hapon.
Samtang, ang filing naman sang COC para sa 2025 midterm elections ang patigayunon sa opisina sang Liga sang Brgy.
Suno kay Sorvito, mas maayo nga magparehistro na sang timprano bangod posible nga magdamo pa gid ang mga tawo sa katapusan subong nga bulan kag indi na mahimo pa nga maakomodar ang iban.
Samtang, ginpahayag ni Negros Occidental Provincial Election Officer Atty Ian Lee Ananoria nga wala na sang extension pa ang Commission on Elections (COMELEC) para sa voters registration.
Suno diri, mahimo nga makaparehistro sa mga COMELEC offices humalin sa Lunes tubtob Sabado kag ang ulihi nga adlaw sang registration amo sa Setyembre 30.
Matapos ang registration, patigayunon ang Election Registration Board (ERB) hearing agud matumod kun pila ang dugang nga mga official voters para sa 2025 midterm elections.
Nagapanawagan ini sa karun sa luyag nga magpatransfer of registration, may correction sa pangalan ukon mag parehistro nga maghingagaw na samtang timprano pa.
