Ginapahanumdom sang Provincial Supervisor sang Commission on Elections sa Negros Occidental sa mga magafile sang Certificate of Candidacy (COC) para sa Barangay and Sangguniang Kabataan Elections nga makig-angot anay sa ila agud magiyahan sa filing.
Sa interview sang Bombo Radyo Bacolod kay Negros Occidental Provincial Comelec Supervisor Atty Ian Lee Ananoria, antes ang pagfile mas maayo nga makig-angot anay sa ila talatapan.
Pahanumdom sang Comelec supervisor nga dapat kumpleto nga mafill out ang COC forms kag tanan ang legally correct.
Dugang pa sini nga kun may ara sang correction sa COC, magakinahanglan pa ang mga magapapili nga magwithdraw kag magrefile bangod indi mahimo nga may correction ang nanotarize na nga papelis.
Bangod sini, indi maayo nga magfile sa last minute sang filing period samtang ginalantaw naman sang Election Supervisor nga ang pagfile sang temprano ang nagapakita sang dedikasyon sa pagserbisyo sa mga pumuluyo.
Suno kay Ananoria, mas maayo nga magkonsulta anay sa ila ang magapapili agud malikawan ang kaangay sang mga nakaligad nga hitabo nga ang magapapili kuntani para sa Sangguniang Barangay ang nagfill out sang COC para sa pagka-Punong Barangay.
Samtang ginpahanumdom man sini nga 23 anyos panubo lamang ang sarang makapapili para sa Sangguniang Kabataan.
Paathag sini nga magdaog man ukon mapierde kun magfile nga nalapas ang age limit para sa SK, ang mga kandidato ang mapasakaan sang kaso.
Suno kay Ananoria, may ara na sa karun sang mga pending nga kaso bangod sa material misrepresentation gikan sa nakaligad nga eleksyon, gani mas maayo kun ang mga magapapili ang magdangop anay sa mga Comelec officers antes magfile sang COC.
