Wala pa sang gindeklarar nga ceasefire ang pamunuan sang Armed Forces of the Philippines para sa holiday season.
Sa pahayag ni Brigadier General Orlando Edralin, commander sang 303rd Infantry Brigade sang Philippine Army, magapadayon ang mga militar sang ila nga mga operasyon kag ginahimo nila ini agud nga masiguro nga malinong kag matawhay ang pagselebrar sang paskwa.
Suno kay Edralin, nagaayo sila sa katapo sang New Peoples Army nga indi luyag ang militar sang away.
Suno diri, mas maayo nga magsungka na lamang ang mga ini kag magbalik sa sabak sang gobyerno agud nga makaupod nila ang ila tagsa ka mga pamilya subong nga paskwa.
Nagpasalig man ang 303rd Infantry Brigade commander nga bukas ang ganhaan sang mga ini sa may luyag nga magsungka kag magbalik na sa sabak sang gobyerno.
Ginpahayag man sini nga ang pagpatay sang mga NPA sa mga sibilyan ang nagapakita lamang kung ano sila ka barbaric kag nagapahibalo lamang nga nagaexister pa sila apisar nga gamay nalang ang ila nga numero.
Suno pa kay Edralin, makapalagyo lamang ang mga rebelde apang indi man sila makapanago bangud all out ang ila operasyon.
Ginpasalamatan man sini ang mga pumuluyo sa komunidad nga nagahatag sang impormasyon angot sa presensya sang mga armado nga grupo sa tagsa ka mga lugar bangud napuno na ang mga ini sa indi insakto nga ginahimo sang rebelde nga grupo.
Ginpahayag man sini nga santo sa pahayag sang mga former rebels may pila pa ka mga kaupdanan sang mga ini nga luyag magsungka apang indi pagpasugtan sang mga commanders.
Suno kay Edralin bukas ang gobyerno sa pagbaton sang mga magasungka nga rebelde kag bukas ang gobyerno sa paghatag sang assistance kaangay lamang sa 42 ka mga anay rebelde nga nakabaton sang cash assistance nagikan sa provincial government sang Negros Occidental.
