Gin-athag sang commander sang 3rd Infantry Division sang Philippine Army nga wala sang may nagakatabo nga destabilization plot sa Armed Forces of the Philippines.
Sa interview sang Bombo Radyo kay Major General Benedict Arevalo, wala sang may nagakatabo nga resignation sa mga generals kag senior officials sang AFP.
Suno diri, nagresign si Department of National Defense (DND) officer-in-charge Jose Faustino Jr. kag nag-upod man ang iban sini nga mga undersecretary kag assistant secretaries posible agud nga mahatagan sang ligwa ang bag-o sa karun nga OIC sang DND nga si Secretary Carlito Galvez Jr. nga magpila man sang iya mga tinawo.
Suno kay Arevalo, wala sang destabilization nga nagakatabo kag gintawag ang nagalapta nga balita nga kuro-kuro, haka-haka kag fake news.
Suno diri, normal lamang sa AFP ang pag-ilis sang commanders kag indi ini dapat paghatagan sang negatibo nga buot-silingon.// Suno sa iya, ang AFP ang professional kag makit-an ini sa bahin sang performance.
Sa bahin sang ordinaryo nga mga suldado suno sa iya, wala sila sang issue basta nagaabot lamang ang ila sweldo kag mga benepisyo, sila ang magapadayon sa pagtrabaho.
Gin-athag man sini nga ang AFP ang wala nagalantaw sa kun sin-o ang Presidente kag wala nila ginajudge ang gobyerno sang amu sini ka timprano.
Dugang pa sini nga indi sila maghilabot sa istorya politika kag magasunod lamang sa change of command.
Suno kay Arevalo, sila ang magasunod sa ila mandato kag indi magpaapekto sa mga nagalapta nga fake news, ang importante, sila ang ginahatagan sang nagakaigo nga sweldo kag suporta.
