Isa sa tatlo ka mga bag-o napromote sa Western Visayas sa ranggo nga Colonel ang commanding officer sa 62nd Infantry Battalion sang Philippine Army.
Gikan sa ranggo nga Lt. Col., nagsaka na ang ranggo ni Col. William Pesase apang paathag sini nga siya ang magapabilin gihapon nga pinuno sa 62nd Infantry Battalion tubtob nga wala pa sang abiso gikan sa ila National Headquarters.
Sa interview sang Bombo Radyo Bacolod kag Pesase, may ara sang qualifications nga ginabasihan antes ginapasaka ang ranggo.
Sa 24 ka tuig sini sa serbisyo, si Pesase ang napromote kasunod lamang sang pagbatun man sini sang award sa National Headquarters sang Philippine Army bangod sa pagpamuno sini sa 62nd Infantry Battalion kun sa diin ila nadismantle ang Central Negros 1 nga grupo sang New People’s Army (NPA).
Ginapasalamatan man sini sa Ginoo ang bugay kag iya man nga ginpasalamatan ang bulig sang mga stakeholder kag cooperating units nga amo ang nangin liyabi sa maayo nga performance sang ila hanay.
Nahibaluan nga kalakip sa area of responsibility sang 62nd Infantry Battalion amo ang banwa sang Isabela, La Castellana, Moises Padilla, kag ciudad sang La Carlota sa Negros Occidental, Guihulngan City sa Negros Oriental kag iban pa nga mga kaiping nga banwa kag ciudad kun sa diin makapila man ka beses nga may nagluntad nga engkwentro sa tunga sang rebelde nga grupo kag mga militar sang nakaligad nga mga tinuig.
