Ginpahayag sang commander sang Bacolod City Mobile Force Company nga makonsider nga organized group ang tatlo ka hold-uppers nga nangawat sa Shopee Express Hub sa Barangay Zone 12, Talisay City.
Ang mga suspetsado ang ginkilala sanday Rodolfo Suelan, 49-anyos, anay security guard kag residente sang Barangay Taculing, Bacolod City; Robero Delos Santos, tricycle driver, residente sang Barangay Villamonte; kag Richard Parcon, 46-anyos, wala sang trabaho kag residente man sang Barangay Villamonte.
Si Suelan kag Delos Santos ang nagasakay sa Pajero kag lunsay nagasuksok sang bulletproof vest samtang nagasakay naman sa motorsiklo si Parcon.
Nakuhaan man ang mga ini sang mga armas luthang nga loaded sang bala.
Sa interview sang Bombo Radyo kay Police Lt Col Ronnie Brillo, isa sa tatlo ka mga suspetsado ang natukiban nga imbulbado sa illegal nga druga.
Suno diri, sa follow up report sang Talisay City Police Station, ang tatlo ka mga suspetsado ang amo man nga nanghold-up sa J&T express malapit sa Huaming kag Barangay Singcang-Airport, Bacolod City.
Pahayag ni Brillo, bangod sa gamit sang mga suspetsado nga bulletproof vest kag nakuha nga armas sa ila sang sila nadakpan, makonsiderar nga isa ka organized group ang mga ini.
