Nagpangayo sang pasaylo si Lieutenant Efren Duran Jr, commander sang BRP Teresa Magbanua kay Philippine Coast Guard Palawan District Commander Captain Dennis Labay matapos nga ini ang magdesisyon nga bayaan ang Escoda Shoal kag dalayon nga magbalik sa Palawan.
Kung madumduman, nagdangat sa lima ka bulan nga nagpabilin ang barko sa nasambit nga bahin sang kadagatan agud nga mabantayan ang teritoryo sang pungsod.
Suno kay Duran, ang iya nga desisyon ang para sa mga personnel sang barko nga nagamasakit na bangud wala na sang mainum nga tubig kag pagkaon.
Ginhimo ni Duran ang pahayag kadungan sang pagreport sini sa Philippine Coast Guard nga ginapamunuan ni Coast Guard commandant Admiral Ronnie Gil Gavan.
Halin sa Manila naglupad padulong sa Palawan si Gavan agud nga iwelcome ang iya nga mga personnel.
Suno kay Gavan, nangin madinalag-on sa gihapon ang mission sang 60 personnel sang BRP Teresa Magbanua.
Gin-athag man sini nga indi ini sabat sa panawagan sang China nga bayaan sang Pilipinas ang lugar.
Wala sang mga ini ginsurrender ang soberanya kag teritoryo sang pungsod sa West Philippine Sea.
