Ginabanta nagadangat sa P4 million ang balor sang halit nga ginbilin sang sunog sa isa ka commercial building sa Corner Gonzaga-Lopez Jaena Street, Barangay 26, Bacolod City, kagab-i.
Ang 3-storey commercial building nga ginapanag-iyahan ni Tomas Lim, ang balaligyaan sang spare parts sang mga salakyan kag motorsiklo kun sa diin sa idalum nahamtang ang Big Thumb General Merchandiser, samtang ang sa naibabaw nga bahin ang nagaserbe naman nga stockroom kag residential quarter sang mga empleyado.
Apat ka mga persona ang narescue sang mga bombero gikan sa naibabaw nga bahin sang nagakalayo nga establishimento.
Ini ang ginalakipan sang duha ka babayi, isa ka amay kag ang isa ka bata.
Napilasan naman si Mark Anthony Moreno, 31 anyos, nga nakaangon sang one inch laceration sa paa.
Suno sa isa ka residente, nakabati sila sang lupok tubtob sa may nagsinggitan na nga babayi sa ibabaw sang building kag nakita nalang nga nagadabadaba na ang kalayo.
Ang sunog ang ginapahayag nagikan sa naibabaw nga bahin sang building.
Suno sa BFP, nagdangat sa second alarm ang sunog kag ginabanta P4 million ang balor sang halit.
Sa karon, ginaimbestigaran pa sang BFP kun ano ang gintunaan sang kalayo.
