Magasugod na subong nga adlaw ang pagbalik sang commercial flights sang pila ka mga airlines sa Bacolod-Silay Airport.
Sa interview sang Bombo Radyo Bacolod kay Provincial Administrator Atty. Rayfrando Diaz, ginpahayag sini nga tatlo ka mga airline companies ang nagpakig-angot kay Negros Occidental Governor Eugenio Jose “Bong” Lacson agud makabalik sa pagbiyahe.
Ang Philippine Airlines (PAL) ang may yara sang commercial flights sa subong nga adlaw Hunyo 16, 17, 19 kag 21.
Suno kay Diaz, alas-8:30 sini nga aga magahalin sa Manila ang eroplano sang PAL padulong sa probinsya.
Magabalik man ini dayon sa Manila pagkaligad sang isa kag tunga ka oras.
Samtang, ang Air Asia naman ang may yara sang duha ka mga flights nga nakatalana sa Hunyo 19 kag 21.
Ang Cebu Pacific naman suno kay Diaz ang luyag magbiyahe kada adlaw apang ulihi na ang mga ini nakapangayo sang clearance sa gobernador gani ang subong nga adlaw lamang nga flight ang napahanugutan.
Natalana ini nga mag-abot sa probinsya alas-3:00 karon sa hapon kag magabalik man dayon sa Manila.
Suno kay Diaz, napasa na sang mga airlines ang detalye sang mga pasahero kag napahibalo naman ang tagsa ka mga local government unit (LGU) sang mga ini agud pag-abot sa airport, nakahanda na ang masugat sa ila.
