Ginkompirmar sang Provincial Administrator sang Negros Occidental nga wala pa sang biyahe ang commercial flights nga padulong sa probinsya.
Sa interview sang Bombo Bacolod kay Atty. Rayfrando Diaz, ginpahayag sini nga ang pahanugutan lamang sang probinsya nga makasulod amo ang Philippine Airlines sweeper flight nga sakay ang mga locally stranded individuals (LSI) nga nagikan sa Manila nga nakatana sa Hunyo 9, Hunyo 10, kag Hunyo 11.
Kapin 597 LSI’s ang ginalauman nga magaabot subong nga semana bangud sa tagsa ka flight may sakay ini sang 199 ka mga LSI.
Sa karun may yara sang 2,400 ka mga LSI ang nalista sang Incident Management Team (IMT).
Ginpahayag man sini nga mahimo man nga makasakay ang mga luyag nga magbalik sa Manila apang kinahanglan nga makig-angot ang mga ini sa Provincial Tourism Office agud mabuligan sa arrangements kag matigayon nga makalakat ang mga ini.
Suno kay Diaz ginpangabay man sini ang airline nga may mga valid nga nabakal na nga tickets nga I-rebook na lamang agud makasakay sa mga flights.
Wala man ginapahanugutan ang mga indi essential ang mga tinutuyo nga makasakay sa sweeper flights bangud para lamang ini sa mga repatriates.
Iplastar naman sang probinsya ang thermal scanner sa airports kag may idesignar naman nga mga nurses agud magtsekyar sa mga nagapauli nga residente kag masiguro nga wala ang mga ini sang ginapakita nga sintomas sang COVID-19.
May yara man sang swabbing booth nga ibutang sa paluparan.
Ginalauman man ni Diaz nga sa tion nga makuhaan ang mga ini sang swab sample, mahimo makuha ang resulta sa sulod sang isa ka adlaw agud makapauli na sa tagsa ka pamilya sa tion nga magnegatibo ang mga ini samtang ang mapositibo naman ang I-isolate agud indi na malatnan ang pamilya kag iban pa nga mga tawo sa palibot.
Dugang pa ni Diaz, nakita man sini nga may yara na sang naapektuhan ang psychological well being gani mapadala ang probinsya sang psychiatrist ukon psychologist agud nga makabulig man sa mga repatriates nga nagakinahanglan sini.
Ginpasalamatan man sang provincial administrator ang tanan nga frontliners nga padayon nga nagaserbisyo para sa mga pumuluyo.
