Pilason ang 37-anyos nga commercial sex worker matapos ginbuno sang iya kustomer nga tricycle driver sa sulod sang Dustin Apartelle Lodge ukon ang anay Taculing Court sa Barangay Taculing, ciudad sang Bacolod kagab-i.
Sa interview sang Bombo Radyo kay Police Major Leo Estopa, station commander sang Bacolod Police Station 6, ginkilala ang biktima kay Jedda Atayan sang Purok San Miguel, Barangay Sum-ag sining ciudad samtang wala pa sang identity ang tricycle driver.
Santo sa panuaron ni Atayan, naghingyo ang suspetsado sang ikaduha nga round sang hingalit nga kalipay apang nagdemand sang bayad ang biktima.
Diri nagpangakig ang suspetsado kag nagkuha ini sang improvised screw driver kag ginbuno si Atayan sa nagkalain-lain nga bahin sang lawas.
Nagpaburhot sang tricycle ang suspetsado bisan wala pa ini nakabayad sa motel gani ginlingling sang room boy ang kwarto kag nakita sini ang sex worker nga duguon.
Gindala ang biktima sa Corazon Locsin Montelibano Memorial Regional Hospital kag yara naman sa estable nga kondisyon.
Suno kay Atayan, indi niya kilala sa pangalan ang suspetsado apang ginlaragway niya ini nga maniwang ang panglawason, itumon ang pamanit, semi-kalbo ang gunting kag 5’4 ang height.
Suno sa station commander, mahingyo sila sang CCTV footage sa kaiping nga mga establisyimento kag balikan man ang lugar sa diin nagsugod ang transaksyon sang duha.
